తెరమీదకు ఆర్బీఐ బాండ్లు
హైదరాబాద్, జూలై 15 (న్యూస్ పల్స్)
RBI bonds on the screen
మీరు మీ సంపాదనలో నుంచి ఏమైనా డబ్బులు పొదుపు చేస్తున్నారా. ఇంకా దీనిని పెట్టుబడుల రూపంలో పెడుతున్నారా? ఇంకా చాలా మంది ఎక్కువ వడ్డీ ఆఫర్ చేసే పెట్టుబడి మార్గాల కోసం చూస్తుంటారు. ఇంకా తమ సొమ్ముకు రక్షణ కావాలని కోరుకుంటారు. ఎక్కువగా వీరు బ్యాంక్ ఫిక్స్‌డ్ డిపాజిట్లలో పెట్టుబడులు పెడుతుంటారు. రిజర్వ్ బ్యాంక్ కొంత కాలంగా రెపో రేట్లను గరిష్ట స్థాయిల వద్ద ఉంచిన సమయంలోనే బ్యాంకులు కూడా ఫిక్స్‌డ్ డిపాజిట్లపై ఆకర్షణీయ స్థాయిలో వడ్డీ రేట్లు అందిస్తున్నాయి. అయితే బ్యాంక్ ఎఫ్‌డీల కంటే కూడా కేంద్ర ప్రభుత్వం హామీ ఇస్తున్న ఒక స్కీమ్ ఉంది. అదే ఆర్బీఐ తీసుకొచ్చిన ఫ్లోటింగ్ సేవింగ్స్ బాండ్లు. వీటిపై అధిక వడ్డీ సహా ఆర్బీఐ సార్వభౌమ గ్యారెంటీ కూడా వస్తుంది. దీంతో మీ డబ్బులకు పూర్తి భద్రత ఉంటుంది.
>> ఆర్బీఐ బాండ్లలో వడ్డీ రేటు ఎప్పుడూ ఒకేలా ఉండదు. స్మాల్ సేవింగ్స్ స్కీమ్స్‌లోని నేషనల్ సేవింగ్స్ సర్టిఫికెట్ (NSC) వడ్డీ రేటుతో ఇది ముడిపడి ఉంటుంది. NSC వడ్డీ రేట్లు ఆర్బీఐ బాండ్స్ వడ్డీ రేట్లు కూడా పెరుగుతాయి. అక్కడ వడ్డీ తగ్గితే ఇక్కడ కూడా తగ్గుతుందని చెప్పొచ్చు. అయితే NSC అందించే వడ్డీ రేటు కంటే ఇందులో 0.35 శాతం వడ్డీ ఎక్కువ లభిస్తుంది.ప్రతి 6 నెలలకు ఓసారి ఇక్కడ వడ్డీ రేట్లను సవరిస్తుంటుంది ఆర్బీఐ. 2024 జులై- డిసెంబర్ అర్ధ వార్షికానికి సంబంధించి జులై 1న ఆర్బీఐ కొత్త వడ్డీ రేట్లు ఖరారు చేసింది. ఎన్‌ఎస్‌సీ వడ్డీ రేటు ప్రస్తుతం 7.7 శాతంగా ఉండగా.. ఆర్బీఐ బాండ్లపై 8.05 శాతం వడ్డీ వస్తుంది. ఏడాదిలో రెండు సార్లు జనవరి 1, జులై 1న వడ్డీ మీ అకౌంట్లో జమవుతుంది.
>> ఆర్బీఐ బాండ్ల కాల వ్యవధి ఏడేళ్లు. దీంట్లో ముందస్తు ఉపసంహరణకు అవకాశం లేదు. సీనియర్ సిటిజెన్స్ మాత్రం కనీస లాకిన్ పీరియడ్ తర్వాత పెనాల్టీతో ముందుగా డబ్బులు విత్‌డ్రా చేసుకోవచ్చు. ఇక 60-70 మధ్య వయస్కులకు ఆరేళ్లు, 70-80 మధ్య వయసు ఉంటే ఐదేళ్లు, 80 ఏళ్లు దాటిన వారికి నాలుగేళ్ల లాకిన్ పీరియడ్ ఉంటుంది.
>> కనీసం రూ. 1000 పెట్టుబడితో ఈ బాండ్లు కొనొచ్చు. గరిష్టంగా ఎలాంటి పరిమితి లేదు. వడ్డీ రేటు పెరగొచ్చు లేకపోతే తగ్గొచ్చు. అందుకే భవిష్యత్తులో వడ్డీ తగ్గితే రాబడిపైనా ప్రభావం ఉంటుందని గుర్తుంచుకోవాలి. ఇంకా బాండ్స్‌పై వచ్చే వడ్డీపై పన్ను చెల్లించాలి. లోన్ అవకాశం ఇక్కడ లేదు.
>> వడ్డీ ఎక్కువ వస్తున్నప్పటికీ.. ఏడేళ్ల వరకు డబ్బుతో అవసరం లేదనుకున్న వారు దీంట్లో ఇన్వెస్ట్ చేయొచ్చు. స్థిర వడ్డీ రావాలంటే ఇందులో పెట్టుబడి పెట్టొద్దు. ఎఫ్‌డీ ప్రత్యామ్నాయం కోసం చూస్తే ఇందులో పెట్టుబడులు పెట్టొచ్చు. సీనియర్ సిటిజెన్లకు బెస్ట్ ఆప్షన్ అని చెప్పొచ్చు. ఆర్బీఐ గుర్తింపు పొందిన ఏ బ్యాంకులో అయినా దీనిని కొనుగోలు చేయొచ్చు. కేవైసీ పత్రాలు సమర్పించాలి.
